Dəhliz mebeli sifariş edərkən nəzərə alınmalı məqamlar
İstənilən evə daxil olanda diqqətinizi ilk olaraq nə cəlb edə bilər? Təbii ki, dəhliz mebeli. Düzdür, heç də bütün evlərdə dəhliz mebeli olmur. Amma razılaşın ki, dəhliz mebelləri evə əlavə gözəllik qatır və içəri daxil olan hər kəsin diqqətini cəlb edir.
Dəhliz mebeli quraşdırarkən də diqqətli olmaq lazımdır. Burada rahatlıq, cəlbedici dizayn kimi kriteriyalar mütləq nəzərə alınmalıdır. Müəyyən nüansları nəzərə almaqla, bunun öhdəsindən gəlmək mümkündür. Digər mebel növlərindəki kimi, dəhliz mebeli seçərkən də ya şəxsi zövqə arxalanacaqsınız, ya da peşəkar interyer dizaynerlərdən və mebel mühəndislərindən məsləhətlər alacaqsınız.
Dəhliz mebelləri evlərin giriş hissəsində quraşdırılır və gündəlik istifadə üçün nəzərdə tutulur. Dəhliz mebelləri dəhlizin mövcud vəziyyətindən asılı olaraq, ona uyğun ölçüdə hazırlanmalıdır. Ölçü elə olmalıdır ki, evin giriş-çıxışına maneə törətməsin. Ölçü düz götürülməsə, gələcəkdə evinizə böyük həcmli əşyalar alanda çətinlik yaşayacaqsınız. Çünki onu dəhlizdən keçirmək asan olmayacaq.
Dəhliz mebelinin görünüşü seçimə ciddi təsir edir. Evin ümumi tərzi ilə yanaşı, bu mebellər dəhlizin döşəmə və tavanındakı elementlərlə - çilçıraq, xalça, kafel və s. ilə də uyğunluq təşkil etməlidir.
Dəhliz mebelinin qapıları müxtəlif olur. Kupe qapılar kiçik dəhlizlər üçün əlverişlidir. Kupe qapı mexanizmləri mütləq şəkildə keyfiyyətli firmaların istehsalı olmalıdır ki, daim işlədildikdə tez sıradan çıxmasın. Siyirməli kupe tipli qapılar isə sıradan çıxarsa, ciddi fəsadlara səbəb ola bilər. Çünki sıradan çıxan mexanizim qapını özündə saxlamır, nəticədə qapı aşaraq digər şeyləri zədələyir.
Dəhliz mebeli, bir qayda olaraq, MDF-dən hazırlanır. Təbii ağacdan hazırlanmış dəstlər isə nisbətən daha bahalıdır və daha çox geniş otaqlar üçün uyğun görülür.
Dəhliz mebeli geyimlər üçün asqılı və bölgülü ola bilər. Bölgülü hissələrin ara məsafəsi böyük olarsa, uzunluq ona nisbətdə kiçilməlidir. Buna səbəb ara boşluqlarda yığılan əşyaların yükünü məhdudlaşdırmaqdır. Açıq şəkildə olan asqılı hissələrə parça materialı, membran, panel və digər materiallarla dekorlar tətbiq etmək mümkündür.
Dəhliz mebellərində əsas hissələrdən biri ayaqqabı bölməsidir. Adətən müasir evlərdə dəhliz ensiz olduğundan dəhliz mebellərinin eni də normal ölçüdən kiçik olur. Nəticədə ayaqqabılıq hissələrdə ayaqqabı yerləşdirmək çətinlik yarada bilər. Bu səbəbdən 45 və 30 dərəcəli bölgülərdən istifadə olunur.
