Ofis mebelinin erqonomikası: Kreslonuz narahatdırsa...
Mebelsiz ev və ya ofis təsəvvür etmək mümkündürmü? Əsla! Evin, interyerin vacib elementi olaraq keçmişdən bəri bəzi əşyalar evləri bəzəməyə davam edir. Odur ki, bu gün mebelsiz ev və ya ofis tapmaqda çətinlik çəkərik.
Mebelin dizayn funksiyası yanında onun əsas vacib funksiyası rahatlıq və erqonomikadır. İnsanlar mebelin rahatlıq funksiyasına o qədər də fikir vermirlər. Çünki əksəriyyət ilk növbədə mebelin dizaynına diqqət yetirir, gözəlliyinə fikir verir və qiymətə aldanır. Halbuki sağlamlığımız üçün ən önəmli məsələ mebellərin rahatlığıdır. Rahat mebel alacağınız halda, həm evinizdə, həm də ofisdə özünüzü rahat və sağlam hiss edəcəksiniz.
Erqonomikaya fikir verilmədən alınan mebellər müəyyən müddətdən sonra insan sağlamlığı üçün fəsadlar törədə bilər. Bu halla üzləşməmək üçün mebellərin rahatlığına daha çox diqqət ayırmaq lazımdır.
Həyatımızın 1/3 hissəsini işdə keçiririk. Dövr dəyişdikcə insanlar iş yerlərində daha çox oturaq vəziyyətdə çalışırlar. Bu da insanların sağlamlığına mənfi təsir göstərir. Erqonomika insan sağlamlığının necə qoruması və onun iş effektivliyinin necə artırılmasına cavab axtarır. O, həm də yorğunluq nəticəsində kompüter arxasındakı iş sürətinin azalması, əsəb - psixoloji xəstəliklərin və dayaq - hərəkət aparatının xəstəliklərinin artması kimi məsələlərlə də məşğul olur. Belə ki, həqiqətən erqonomik ofis kreslosu erqonomik mebellə birlikdə işdə düzgün pozanı almağa imkan verir, istehsal yorğunluğunun, onurğa xəstəliklərinin, varikoz vena genişlənməsinin və iş yerində qazanılan digər xəstərliklərin yaranmasının qarşısını alır. Bu səbəbdən ofis kresloları qoltuqlar, bel üçün yastıqçalar, müxtəlif mexanizmlər və başqa əlavə elementlərlə təchiz edilir.
Ofis şəraitində çalışan bütün işçilərin işini yüngülləşdirmək və effektivliyini artırmaqdan ötrü iş yerlərinin tərtibatına ciddi yanaşılmalıdır. Keyfiyyətli və rahat kreslolar işdə məhsuldarlığı artıracaq. Əgər ofisdə oturduğunuz kreslo rahat deyilsə, mütləq aidiyyatı əməkdaşa müraciət edin. Çünki vaxt keçdikcə narahat kreslo sizə ciddi problemlər yaradacaq. Bu halla üzləşməmək üçün vaxtında aidiyyatı şəxsə deyin və sizə erqonomik kreslo verilməsini tələb edin.
