Uşaq otağı necə olmalıdır?
Uşaqlar günlərinin çox hissəsini öz otaqlarında keçirirlər. Uşaq üçün otağı onun böyük və sərhədsiz dünyasının bir hissəsinə çevrilir.
Uşaqlar üçün isti, işıqlı, günəş işığı düşən otaq seçilməlidir. Uşaqlar üçün orta ölçülü otaqlar nəzərdə tutulmalıdır. Burada əşya və mebeldən də az istifadə olunmalıdır ki, otağı təmiz saxlamaq rahat olsun. Uşaq otağının mebeli onun boyuna uyğun seçilməlidir. Mebel elə yerləşdirilməlidir ki, onların rahat oynamaları üçün yer qalsın.
Uşaq mebeli alarkən ilk növbədə, uşağınızı analiz etməlisiniz. Uşaq otağına mebel alarkən uşağınızın hansı rəngli oyuncaq və geyimlərə üstünlük verdiyinə diqqət edin. Nəzərə alın ki, uşağınız ilk vaxtlarda gününün çox hissəsini öz otağında keçirəcək. Çalışın seçdiyiniz mebelin rəngi otağın divar rəngləri ilə ahənglik təşkil etsin. Rənglərin bir-birindən kəskin fərqlənməsi uşağın gözünün yorulmasına və ya mənfi auraya köklənməsinə səbəb ola bilər. Uşağınızı kəşf etməkdə çətinlik çəkirsinizsə, o zaman psixoloqla məsləhətləşin.
Uşaq otağı üçün mebel təbii materiallardan hazırlanmalıdır. Mebelin küncləri dəyirmi olmalıdır ki, uşaq oynayarkən dəyib zədələməsin. Eləcə də mebelin keyfiyyətinə fikir vermək lazımdır. Belə ki, uşaqlar onu sındıra bilməsinlər. Mebel çox böyük olmamalıdır. Uşaq asanlıqla əlini uzadıb rəflərdən ona lazım olan əşyaları, geyimləri götürə bilməlidir.
Gözəllik öz yerində, amma mebelin təhlükəsizliyinə xüsusi diqqət edin. Diqqətinizi çəkən bir çox mebellər özündə təhlükəli elementləri birləşdirir. Diqqət edin ki, mebelin iti bucaqları olmasın. Qapılarda tənzimləyici mexanizm olmasına diqqət edin ki, uşağın əli qapı arasında qalmasın. Digər bir məqam isə qapı açarları ilə bağlıdır. Çalışın seçdiyiniz mebelin qapısı içəri tərəfdən bağlanan olmasın. Mebel rəflərinin kip yerləşdirilməsinə diqqət edin ki, uşaq hər hansı bir əşyanı götürərkən rəf onun üzərinə aşmasın.
Uşaqlar şəkil çəkməyi xoşlayır və çox vaxt rəsmlərini evin divarlarına çəkirlər. Çıxış yolu kimi divara yazı lövhəsi vurmaq olar. Əgər yazı lövhəsi yoxdursa, linoliumdan istifadə etmək mümkündür. Linolium asan təmizlənir. Tünd rəngli linoliumu dördkünc kəsib divardan asaraq lövhə kimi istifadə etmək olar. Bu, həm otağa xüsusi yaraşıq verər, həm də uşaqlar burada istədikləri şəkilləri çəkə bilərlər. Uşaq otağında uşaq masası da önəmli əşyadır. Yazı stolu o qədər rahat olmalıdır ki, uşaq dərslərini rahatlıqla hazırlaya bilsin.
