Ləkə götürməyən dəri üzlüklü mebellər
Dəri üzlüklü mebellərdən vaxtilə daha çox iş yerləri, ofislərdə istifadə olunardı. Müasir zamanda isə artıq ev dekorasiyasında dəri üzlüklü mebellərdən tez-tez istifadə olunur.
Təbii dəri üzlük inək, qoyun, keçi kimi heyvan dərilərindən hazırlanır və heyvanın növündən asılı olaraq qiymətlər dəyişir. Təbii dəri istifadə müddətində müxtəlif kimyəvi təmizləyici vasitələrlə təmizləndikdə zədələnə bilər. Süni dəri isə sintetik məhsuldan hazırlanır və plastik olur.
Təbii dəri tozu içinə çəkmir, gigiyenik olaraq təmizdir. Bundan əlavə, təbii dəri daha dayanıqlıdır. Lakin dəri kreslo və divanlarda müəyyən müddət sonra boşalma və qırışıqlıq hiss oluna bilər. Süni dəri isə əksinə hamar və kip qalır. Təbii dəri hava aldığı üçün süni dəridən fərqli olaraq, isti havalarda, yay aylarında az tərləyir.
Bu gün dəri mebel əşyaları çoxları üçün xəyaldır. Çox baha olduqlarından hər insanın dəri mebel əşyası almağa maddi imkanı yoxdur. Bu materialdan hazırlanan divanlar və kreslolar həmişə möhkəm və cəlbedici görünür, onların üzərində istirahət etmək xoşdur. Mebel sahibləri həqiqi dərinin uzun illər davam edə bilən praktik bir xammal olduğunu bildirirlər.
Dəri mebel hörmətlilik rəmzidir. Bu cür mebel ev sahibinin vəziyyətini vurğulaya bilər. Qəşəng dəri divanın yerləşdiyi ofisə daxil olaraq dərhal sahibinin yüksək sosial statusunun sübutunu görmüş olursunuz. Dəri yumşaq mebel müəyyən texnologiyalara əsasən istehsal olunan xüsusi aşılanmış dəridən hazırlanır. Buna görə də, digər mebelləri dayanıqlılıq baxımından üstələyir.
Dəri divanda və ya stulda təsadüfən tökülən su içəri hopmur. Bu cür hallarda quru parça ilə asanlıqla təmizlənə bilir. Bundan əlavə, dəri divana baxmaq, qulluq etmək daha asandır. Dəri divanlarda hər hansı bir ləkəni alkoqola batırılmış salfet ilə silə bilərsiniz. Bununla həmin ləkə tez bir zamanda aradan qalxacaq.
Dəridən həm modern, həm də klassik tərz mebellərdə istifadə olunur. Daha çox divan və kreslolarda istifadə olunsa da, son zamanlar yataq otağı mebellərində də dəri parçaya müraciət edilir. Dəri üzlüklü mebelləri günəş işığından qorumaq lazımdır, çünki günəş dərini solğunlaşdırır.
